Электронды темекі "Жайсаннан" өте алмады: шекарада ірі партия тәркіленді

"Жайсан" өткізу пункті арқылы Ресейден вейптерді заңсыз әкелу әрекеті тоқтатылды, деп хабарлайды Zakon.kz Қаржылық мониторинг агенттігі баспасөз қызметіне сілтеме жасап.

Ақтөбе облысы бойынша Қаржы мониторингі агенттігінің департаменті Шекара қызметімен бірлесіп, Ресей Федерациясынан Қазақстанға вейптерді заңсыз әкелу әрекетінің жолын кесті.

"Жайсан-автомобиль" шекаралық бақылау-өткізу бекетінде Ресейден келе жатқан екі жүк көлігі ұсталды.

Тексеру барысында көліктерден ірі көлемде тыйым салынған өнімдер табылды:

• 13 мың электронды тұтыну жүйесі (вейп),
• 2 мың дана вейпке арналған сұйықтық,
• 14 мың дана темекісіз темекі өнімдері.

"Аталған факті бойынша екі азаматқа қатысты сот үкімі шықты. Олар 6 айға бас бостандығынан айырылды. Вейптер тасымалданған көліктер (жалпы құны 26 млн теңге) мемлекет пайдасына тәркіленді", - деп хабарлады ведомство.

Сот үкімі заңды күшіне енген жоқ.