Түркістан облысының тұрғыны өз үйінде әскери музей жинаған
Сурет: Zakon.kz/Лика Морозова
Әскери топтамада суреттер ерекше орын алады. Картиналарда қиян-кескі шайқастар көрінісі мен батырлардың бейнелері салынған. Осы арқылы қария жерлестерінің ерлігін ұмыттырмай, оны кейінгі ұрпаққа жеткізуді мақсат етеді. Картиналар арасында Бауыржан Момышұлының бейнесі де тұр. Дәл осы портретке ол талай маңдай-тер мен ұзақ уақытын жұмсаған.
"Менің галерея-музейімде тек өзім жасаған заттар ғана емес, айырбастап алған дүниелер де бар. Бірде қосымша жұмысқа бардым, қарасам, бір бұрышта Сталиннің үлкен портреті тұр. Үй иесіне ақшаның орнына соны беруді ұсындым. Ол бірден келісті. Қазір ол сурет осы бөлмеде тұр. Ал қалған картиналардың бәрі – өзімдікі! Бұрын одан да көп еді", – дейді Семешко.
Сурет: Zakon.kz/Лика Морозова
Тұрар Рысқұлов ауылының тұрғыны мектеп кезінде алғаш рет қолына қылқалам алып, сурет сала бастағанын айтты. Содан бері сурет салу оның өмірінің ажырамас бөлігіне айналған. Жылдар бойы ол әскери тақырыпта көптеген туынды жасап, кескіндемемен айналысып, мәдени орындарға афишалар да дайындаған. Көптеген жұмыстарын туыстары мен ауылдастарына сыйға тартқан. Қазір 90 жастағы қария сурет салмаса да, өлең мен әңгіме жазуды жалғастырып келеді.
"Менде табиғат көріністері мен ою-өрнектер бейнеленген суреттер де көп. Балаларым мен немерелерім келіп, оларды естелікке алып кеткен. Атасының еңбегін көріп жүргені – мен үшін үлкен мақтаныш. Көршілерге де талай сурет сыйладым. Жалпы, өмірдің мәні – бір іспен айналысу деп ойлаймын", – дейді ақсақал.
Сурет: Zakon.kz/Лика Морозова
Қария өзінің еңбек жолын да мақтанышпен еске алады. Ол Ұлы Отан соғысы жылдарында тылда еңбек еткені үшін медальмен марапатталған. Сондай-ақ колхоздағы өртті сөндіруге қатысқаны үшін де алғыс алған. Айтуынша, соңғы марапаты – ең қымбаты.
"Менде бірнеше медаль бар, шығармашылық үшін де алғандарым бар. Бірі – соғыс кезінде тылда еңбек еткенім үшін. Ол кезде бәрі жұмыс істеді ғой. Ал тағы бірі – өрт сөндіру көлігімен колхоздағы өртті сөндіргенім үшін берілді", – дейді Николай Семешко.
Сурет: Zakon.kz/Лика Морозова
Ақсақалдың үйі қонақтарға әрдайым ашық. Бақшада таңқурай мен көкөніс өсіріп, келген адамдарды қуана қарсы алып, екінші қабаттағы шағын музейін мақтанышпен көрсетеді.
"Мен баян да тартамын, әскери әндерді көп білемін. Сондықтан біздің үйде тек сурет емес, музыкаға да орын бар", – деп күлді ауыл тұрғыны.
Сурет: Zakon.kz/Лика Морозова
Қарт суретші өз картиналарын сатпайды, аукционға да шығармайды. Бірақ оның арманы – жеке көрме ұйымдастыру. Ол көрмеде тек әскери тақырыптағы емес, туған жерінің табиғатын бейнелейтін пейзаждарын да көрсеткісі келеді. Себебі Түлкібас өңірінің табиғаты өте көркем.
