Түркістан көшелерінде тағы бір Tesla Cybertruck көзге түсті - ол кімге тиесілі
Сурет: gov.kz
Белгілі болғандай, Tesla Cybertruck көлігі ҚР ТЖМ қызметіне тиесілі. Ол 15 мамырда өтетін Түркі мемлекеттері ұйымы бейресми саммиті кезінде Түркістан қаласында жедел әрекет ету және қажет болған жағдайда іздестіру-құтқару жұмыстарын жүргізу үшін тартылған.
"Түркі мемлекеттері ұйымы бейресми саммиті кезінде Түркістан қаласында жедел әрекет ету және қажет болған жағдайда іздестіру-құтқару жұмыстарын жүргізу үшін ҚР ТЖМ қызметінің Tesla Cybertruck көлігі дайындыққа келтірілді",- деп атап өтті ҚР ТЖМ баспасөз қызметі.
Ведомство Түркістан облысының орталығында жүрген екі Tesla cybertruck-тің суреттері мен бейнесін ұсынды.
Сурет: gov.kz
Министрлік атап өткендей, электрлі пикап қазірдің өзінде Алматы қаласының таулы аймақтарында және оған іргелес аумақтарда жүргізілетін іздестіру-құтқару операцияларында пайдаланылуда. Бұл өңірлерде жыл сайын туристер мен альпинистердің легі жоғары деңгейде тіркеледі.
"Көлік спутниктік интернетпен, тепловизоры бар кәсіби квадрокоптерлермен, арнайы байланыс құралдарымен, қорғалған есептеу техникасымен және автономды қуат көздерімен жабдықталған. Бұл төтенше жағдай аймағында құтқарушылар мен медициналық қызметтердің іс-қимылдарын жедел үйлестіруге мүмкіндік береді. Мұндай жабдық алғашқы барлауды жүргізуге, құтқару және медициналық қызметтердің іс-қимылдарын үйлестіруге, жабдықты жеткізуге және мобильді штабты төтенше жағдай орнында орналастыруға мүмкіндік береді".ҚР ТЖМ баспасөз қызметі
Сурет: gov.kz
Ведомство автокөлік жедел басқару шешімдерін қабылдауды, сенімді байланысты және жедел қызмет күштерін тиімді басқаруды қамтамасыз ететін мобильді командалық-барлау пункті ретінде де қолданылатындығын айтты.
"ТЖМ үшін маңызды факторлардың бірі іштен жанатын қозғалтқышы бар көліктерге шектеу қойылған табиғатты қорғау аймақтарында автокөлікті пайдалану мүмкіндігі болды. Электрлі платформаны қолдану таулы аумақтардың экологияға зиян келтірмей, бөлімшелердің ұтқырлығын сақтауға мүмкіндік береді".ҚР ТЖМ баспасөз қызметі
Бұған дейін Түркістанда полиция мен арнайы қызметтер күшейтілгенін жазғанбыз.
