ШҚО-да аю 58 жастағы ер адамды тап берді
Сурет: pixabay
2026 жылғы 24 тамызда YK-news.kz жазғандай, оқиға Батыс Алтай мемлекеттік табиғи қорығына жақын маңдағы демалыс орындарының бірінің жанында болған. Риддер тұрғынымен бірге жүрген екі ер адам оған көмектесіп, аюдан қорғануына жәрдемдескен. Осыдан кейін жыртқыш қашып кеткен. Бұл жағдай ер адамның аман қалуына себеп болған.
Алайда ер адам бірнеше күн жансақтау бөлімінде, кейін травматология бөлімінде емделген. Риддер қалалық ауруханасының мәліметінше, науқастың басы, қолы мен аяғында көптеген көлемді жара болған. Сонымен қатар қолы мен аяғы сынып, сүйектері ығысқан.
2026 жылғы 19 тамызда науқас ауруханадан шығарылған. Қазір ол үйінде ем қабылдап жатыр.
"Оқиғадан кейін бірден инспекторларымыз қару алып, оқиға орнына барды. Аю атып алынды, қазір ол жерде қауіп жоқ. Оның адамға не себепті тап бергенін айта алмаймын. Биыл тұрғындардан көп өтініш түсіп жатыр. Біз оқиға орнына барып, аюларды үркітеміз. Ал адамға нақты қауіп төнген жағдайда, соңғы амал ретінде аюды атуға тура келеді. Малға шабуыл жасаған жағдайлар болды, адамдардың аюмен жақын кездесіп қалған кездері де бар. Бірақ менің тәжірибемде бұл — аюдың адамға алғаш рет тап беруі. Жедел әрекет ету жасағында үш жыл, ал орман шаруашылығында 20 жылға жуық жұмыс істеп келемін. Мұндай жағдайды бұрын-соңды көрмедім", – деді орман және аңшылық шаруашылығы жедел әрекет ету жасағы бастығының орынбасары Сергей Карманников.
Сергей Карманниковтің айтуынша, кейінгі уақытта өңірде аю саны көбейген. Былтыр инспекторлар аюлардың көп төлдегенін байқаған. Әр аю екі-үш қонжықтан әкелген.
Алайда былтыр да, биыл да ормандағы өнім аз болған. Аяз бен құрғақшылықтың салдарынан орманда жидек пен самырсын жаңғағы іс жүзінде болмаған.
Мамандардың болжамынша, аюлардың адамдарға жақындауына осы жағдай себеп болуы мүмкін. Жануарлар азық іздеп, қоқыс орындарына, қараусыз қалған саяжайлар мен бақшаларға шыға бастаған.
