300 мың долларлық есірткі тәркіленді: Қазақстан, Ресей және Өзбекстан бірлескен операция өткізді

Қазақстан Ұлттық қауіпсіздік комитеті Ресей мен Өзбекстанның арнайы қызметтерімен бірлесіп, Ауғанстаннан "Солтүстік бағыт" арқылы есірткі контрабандасын тасымалдау арнасын тоқтатты, деп хабарлайды Zakon.kz.

ҰҚК мәліметінше, операция барысында Ресейдің Түмен қаласында халықаралық есірткі тобының екі мүшесі ұсталды.

Тінту кезінде олардан Ауғанстанда өндірілген 30 келі гашиш тәркіленді. Алдын ала бағалау бойынша, оның қара нарықтағы құны шамамен 300 мың доллар болуы мүмкін.

Осы дерек бойынша Ресейдің құзырлы органдары сотқа дейінгі тергеу жүргізіп жатыр.

ҰҚК халықаралық есірткі айналымына қарсы іс-шаралар жалғасып жатқанын атап өтті.