Президент халық жазушысы Мұхтар Мағауинді мерейтойымен құттықтады

Сурет: zakon.kz

Мемлекет басшысы жазушының әдебиет пен ғылымдағы еңбегін ерекше атап өткен.

Президент Қасым-Жомарт Тоқаев Қазақстанның халық жазушысы, Мемлекеттік сыйлықтың лауреаты, қазақ әдебиетінің аса көрнекті өкілі, қабырғалы қаламгер Мұхтар Мағауинді 80 жасқа толған мерейтойымен құттықтап, ізгі тілегін арнап, жеделхат жолдады, деп хабарлайды zakon.kz.

Жеделхат мәтінін ҚР Президентінің баспасөз хатшысы Берік Уәли Facebook-тегі парақшасында жариялады.

Мемлекет басшысы жазушының әдебиет пен ғылымдағы еңбегін ерекше атап өткен.

"Сіз көрнекті жазушы әрі зерделі зерттеуші ретінде төл әдебиетіміздің дамуына зор үлес қостыңыз. Қаламыңыздан туған әр шығармаңызда ұлттық рух пен елдік мүдде айқын көрініс тапты. Хандық дәуірдегі ақын-жырауларымыздың мол мұрасын жаңғыртқан "Қобыз сарыны" атты ғылыми еңбегіңіз сөз өнерінің тұғырын одан әрі биіктете түсті. Әйгілі "Аласапыран" романы бүгінде әдебиетіміз бен тарихымыздың қымбат қазынасына айналды. Тартымды туындыларыңыз арқылы қалың оқырманның ыстық ықыласына бөленіп келесі", – деп баға береді Президент жазушы шығармашылығына.

– Ұлтты ұйыстыру және тәуелсіздігімізді нығайту жолындағы еселі еңбегіңіз – өскелең ұрпақ үшін үлгі-өнеге. Әрдайым мерейіңіз үстем болсын! Сізге зор денсаулық, отбасыңызға бақ-береке және шығармашылық табыс тілеймін! – делінген жеделхатта.

Оқи отырыңыз