Шымкентте Бас мүфти атынан 2 мың адамға ауызашар себеті үлестірілді
![Отырар, сурет - Zakon.kz жаңалық 05.05.2021 19:39](https://kaz.zakon.kz/pbi/WEBP/2023-12-20/file-a0f32b62-2e5f-4bab-8c83-e618a77bd2e3/800x452.webp)
Шымкентте қасиетті Рамазан айындағы қайырымды істер жалғасуда. Мұнда ҚМДБ Төрағасы, Бас мүфти Наурызбай қажы Тағанұлының атынан ораза ұстаған тұрғындарға "Ауызашар себеті" үлестірілді, деп хабарлайды zakon.kz Отырарға сілтеме жасап.
Игі іс-шараға Шымкент қаласының бас имамы Бақдәулет Абдрахманов, наиб имамдар Мұхамеджан Естеміров пен Мұсабек Ақтамберді, аудандық мешіт имамдары мен ерікті топ мүшелері қатысты.
Дәстүрлі шара барысында Шымкент қаласының бас имамы Бақдәулет Абдрахманов қайырымдылық шарасының мән-маңызына тоқталып өтті.
Елдегі карантиндік талаптарға сәйкес, ҚР Бас мемлекеттік санитариялық дәрігердің және Шымкент қаласының бас мемлекеттік санитариялық дәрігердің қаулысына орай, дәстүрлі түрде өтетін ауызашар дастарханы орнына азық-түлік түрінде мұқтаж және көпбалалы отбасыларға және ораза ұстазаған азаматтарға үлестіріліп жатыр. Игі іс-шара қалалық "Ақмешіт", "А.Қаттани", "Қождан ата", "Торлан", "Байғұт баба", "Бойыт ата", "Сейіткәрім қажы", "Аңламас ата", "Шәкірбай қажы", "Шейх Мұхамед Садық", "Ар-Рақиб", "Әл-Біләл", "Тәжібай ата", "Елтай", "Әл-Муслим" мешіттерінде ауызашар ас мәзірі әзірленіп, 2 мың отбасыға ауызашар себеті үлестірілді, – деді қаланың бас имамы.
Өз кезегінде, жергілікті тұрғындар Бас мүфтиге алғыстарын айтып, елдің амандығы мен тыныштығына дұға етіп, дән ризашылықтарын білдірді.
Айта кетейік, Шымкент қаласы әкімдігі мен Шымкент орталық мешітінің ұйытқы болуымен бүгінде қалада «Рамазан – қайырымдылық айы» қайырымдылық шарасы бойынша көмек алушылардың базасы жасалған.