Түркістан облысында өгей анасының балаларды жәбірлеу фактісі бойынша қылмыстық іс қозғалды

facebook.com

Ата-ана құқығынан тек өгей анасын ғана емес, сондай-ақ әкесін де айыру жөніндегі сұрақ қарастырылуда.

Жетісайда өгей шешенің үш қыз балаға жауыздық жасау дерегі Бас прокуратураның бақылауына алынды, деп хабарлайды Zakon.kz ҚР БҒМ баспасөз қызметіне сілтеме жасап.

- Түркістан облысында ауыл мектебінің мұғалімдері оқушылардың денелерінде ісіктер мен ұрып-соғудың іздерін байқап, полиция қызметкерлерін шақырған, кейін АІІБ-і тарапынан қылмыстық іс қозғалған. Балаларды жәбірлеген әйел бірден полицияға жеткізілді. Өгей анасы балаларын ұрып-соққан, денелерінде пышақ іздері бар. Аталған іс Ішкі істер министрлігі, Бас прокуратура, Білім және ғылым Министрлігі тарапынан бақылауға алынып отыр. Аталмыш факті бойынша тексеру жұмыстары жүргізілуде, - деп хабарлап отыр ведомство өкілдері.

Осы орайда Білім және ғылым министрі К.Н.Шамшидинованың тапсырмасымен Түркістан облысына министрдің кеңесшісі Раиса Шер жедел түрде бағытталды.

Түркістан облыстық білім басқармасының ақпаратына сәйкес соққыға жығылған оқушы үйіне жіберілмей, туған апасына жеткізіліп, қазіргі таңда толық қауіпсіздікте.

- Бүгінгі таңда 140-баптың 2-тармағына сәйкес қылмыстық іс қозғалып, іс сотқа жіберілгендігі, сонымен қатар қамаққа алу түріндегі жазаны орындау бойынша шара қолданылғаны белгілі болды. Ата-ана құқығынан тек өгей анасын ғана емес, сондай-ақ әкесін де айыру жөніндегі сұрақ қарастырылуда, - деді Білім министрлігінің өкілдері.

Бұған дейін Түркістан облысындағы Жетісайда 1991 жылғы әйелдің үш қыз балаға жауыздық жасағаны жайлы хабарланған болатын.

Оқи отырыңыз