ШҚО ірі ЖКО болып, алты адам қаза тапса, тағы сегізі жапа шекті
pixabay.com
28 сәуір күні шамамен сағат 16:30 Абай аудандық ПБ кезекші бөліміне адам өлімімен аяқталған жол-көлік оқиғасының орын алғаны жайлы хабар келіп түскен, деп хабарлайды Zakon.kz ШҚО Полиция департаментінің баспасөз қызметіне сілтеме жасап.
Қарауыл ауылының 47 жастағы тұрғыны Tоyota Corolla автокөлігімен Қасқабұлақ ауылынан Семей қаласына қарай кетіп бара жатқан. Ол кенет, тас жолдың 3 шақырымында семейлік тұрғын 32 жасар әйел адам тізгіндеген Lada Priora автокөлігімен қақтығысқан. Жан түршігерлік жол апатының нәтижесінде 6 адам қаза тапты, оның ішінде 2018 жылы туған бір жасар сәби бар. Тағы 8 адам әртүрлі дене жарақаттарымен медициналық мекемеге жеткізілді.
Жол-көлік оқиғасына қатысты ҚР ҚК 345-бабының 4-бөлігіне (Абайсызда екі немесе оданда көп адамның өліміне әкеп соқтырған жол жүру ережесін бұзу) сәйкес сот алды тергеу жұмыстары басталды.
