"Алматыда балаларды ұрлап жатыр" деп жалған ақпарат таратқан мына әйел екен

Полиция қызметкерлері жалған ақпарат авторын бір күннің ішінде анықтап, ұстаған.

Алматы қалалық полициясы әлеуметтік желі мен мессенджерлер арқылы "балаларды ұрлап, Қытайға жіберіп жатыр-мыс" деп тараған жалған ақпараттың авторын ұстады, деп хабарлайды Zakon.kz қалалық полиция департаментінің баспасөз қызметіне сілтеме жасап.

Полиция қызметкерлері жалған ақпарат авторын бір күннің ішінде анықтап, ұстаған.

- Ол 1991 жылы туған Р. есімді жергілікті тұрғын болып шықты. Әйел елді негізсіз дүрліктіріп, қорқыныш тудырған аудио хабарламаның авторы екенін мойындады. Ол бұл жайтты құрбысынан естігенін айтты. Қазіргі уақытта оның іс-әрекеті ҚР Қылмыстық кодексінің 274 бабы, 2-тармағы бойынша бағаланып, ақпараттық-коммуникациялық жүйелер көмегімен жалған ақпарат таратқаны үшін полиция департаментінің Тергеу басқармасы сотқа дейінгі тергеу ісін қолға алды», - деді Алматы қалалық полиция департаментінің Қылмыстық полиция басқармасының бастығы полковник Жанболат Зиадин.

Әйел өз ісіне өкініш білдіріп, алматылықтардан кешірім сұрады.

- Мен жүктеген хабарламадан дүрлігіп, негізсіз қорқыныш туғызғаным үшін Алматы тұрғындарынан кешірім сұраймын. Шынымды айтсам, мен бұл ақпаратты әлеуметтік желіде тарап, одан бүкіл ел дүрлігіп, қорқады деп ойламадым. Кешіріңіздер мені, - дейді ол.

Полициядағылар Интернет желісіндегілердің мәдениетінің өте төмен болатынын баса атап өтті.