Желіде масқара видеосы тарап, жұмысынан айырылған әкімді халық кері қайтаруды талап етуде
pkzsk.info
Желіде масқара видеосы тарап, жұмыстан кетуге мәжбүр болған Солтүстік Қазақстан облысындағы ауыл әкімі Қайырболат Чехмановқа жергілікті халық араша түсіп, оны қайта қызметіне қайтарып алғалы жатыр, деп хабарлайды Zakon.kz КТК телеарнасына сілтеме жасап.
Облыс шенеуніктері арақ ішіп қызметтік көлігімен шарбақты соққан, содан соң қызметімен қош айтысқан ауыл әкімін әкімдікке қайтып оралтуға келісімін берді.
Ащы су ішіп абыройын төккен Қайырболат Чехмановқа қарапайым ауыл тұрғындары араша түсіп, кері қайтарыңдар деп табандап тұрып алған болатын. Бірақ, Якорь ауылының экс-басшысы қайта оралса да, әкім ретінде емес, жай қызметкер есебінде жұмысын жалғастырады.
Қуаныш Сарбалинов, Қызылжар аудандық әкімдігінің аппарат жетекшісі:
- Мемлекеттік қызметкер есебінде қайтып жұмысқа алу мүмкін емес. Себебі, өз еркімен арыз жазып кетіп қалған. Сондықтан келісімшарт негізінде қызмет ұсындық. Оның өзінде келер жылдан бастап жұмысқа кірісе алады. Бірақ ол әлі ойланатынын айтты.
"Солтүстік Қазақстан облысындағы Якорь ауылдық округінің әкімі Қайырболат Чехманов арақ ішіп, қызметтік көлігімен ауылдасының шарбағын қиратып кеткен болатын. Үй иесі теңселіп тұрған әкімді ұялы телефонға түсіріп, әлеуметтік желіге салды. Шудан соң ол қызметімен қош айтысты. Алайда іле-шала оқиға басқа арнада өрбіп, бір топ ауыл тұрғыны Чехмановты кері қайтаруды талап етті. Экс-әкімнің ауылға жасаған "жақсылығы шаш етектен" деген тұрғындар жергілікті билікті біраз тықсырып, енді аудандық шенділер қарашаның уәжімен келісіп отыр. Сөйтіп ауыл жұрты атышулы Қайырболат ісінің қайырын күтпек. Тіпті оның көктемде өтетін ауыл әкімі сайлауында бағын сынап, қайтадан әкім атануына мүмкіндігі бар екен", - дейді телеарна тілшісі.
Айта кетсек, Чехманов бұл шулы оқиға кезінде өзінің арақ ішпегенін, тек ауырып жүргенін айтқан. Әкімдіктегілер де оның денсаулығы сыр беріп, жұмыстан кетуге баяғыдан өтініш қылып жүргенін растаған болатын. Бірақ жергілікті халық оны жібергісі жоқ.
Оқи отырыңыз: Желіге масқара видеосы тараған әкім жұмысынан айырылды
Тағы да: Желіде масқара видеосы тараған экс-әкім: 300 мың теңге бопсалады
