Алматы облысында жүк көлігі жолаушылары бар жеңіл көлікті мыжып жіберді
zakon.kz
Алматы облысында жүк көлігі жеңіл көлікпен соқтығысып, салдарынан бір адам қаза тапты, деп хабарлайды zakon.kz.
Апат Панфилов пен Еңбекші ауылдары арасындағы Құлжа тас жолы бойында орын алған. Howo жүк көлігі қалаға қарай, ал Toyota Camry облысқа қарай қарама-қарсы бағытта келе жатқан.
Алдын ала мәліметтер бойынша, Toyota Camry жүргізушісі рөлге ие бола алмай, көлік қарсы жолаққа шығып, жүк көлігінің тура алдына келіп айналып тоқтаған. Жүк көлігінің жүргізушісі қатты сасып, қандай да бір әрекет жасап үлгермей, Тойотаның артқы жағынан іліп, оны бірнеше ондаған метрге алға сүйреп тастады.
Toyota Camry жолаушысы алған жарақаттарынан оқиға орнында қайтыс болды, ал жүргізушісі ауыр халде жақын ауруханаға жеткізілді.
Полиция апат орнында жұмыс істеп, барлық мән-жайларын анықтап жатыр, тиісті сараптамалар тағайындалды.
Toyota Camry-де қысқы дөңгелектер болғандығы айтылады.
