Ажырасқан қарағандылық ер адам қайын жұрттағы әйелі мен баласын ұрлап әкетті
Polisia.kz
Балқаш қаласының тұрғыны қызы мен немересінің жоғалып кеткендігі туралы полицияға арызданды. Оларды бұрынғы күйеу баласы ұрлап кеткені белгілі болды, деп хабарлайды zakon.kz.
Polisia.kz мәліметі бойынша, 67 жастағы ер адам полицияға немересін балабақшадан алып қайтуға кеткен қызы сол күйі үйге оралмағаны туралы хабарлаған. Полиция қаладан шығатын жолдарды жауып, балабақша жұмысшыларымен сұхбаттасып, арызданушының бұрынғы күйеу баласы келіншек пен баланы көлікке мәжбүрлеп отырғызып, алып кеткенін анықтады.
Ажырасқаннан кейін келіншек баласын алып, қайынжұрты - Балқаштағы ата-анасының үйіне оралған, ал күйеуі Қарағандыда қалған. Бұл туралы полицияға облыс орталығындағы әріптестері ақпарат берді. Олар ұрланған адамды Қарағанды қаласының жеке үйлерінің бірінен тауып, қаскүнемді ұстады. Ол өзінің бұрынғы әйелі мен қызын ұрлап кеткенін баласын жиі көргісі келетіндігімен түсіндірді.
"Бас бостандығынан заңсыз айыру" бабы бойынша тергеу басталды.
