Оралда әйелін пышақтап өлтірген шендінің ісіне қатысты тың мәлімет жарияланды
PxHere
Оралдық Кәкима Қажипанова қызын 18 жерден пышақтап өлтірген қылмыскер жазадан құтылып кете ме деп алаңдайды. Өйткені тергеу амалдары төрт ай өтсе де, әлі аяқталмаған, деп хабарлайды zakon.kz Астана телеарнасына сілтеме жасап.
"Бұрынғы күйеу баланың қызыма көрсетпеген қорлығы жоқ, әйелін ұрып-соғуды әдетке айналдырған жігіттің оны өлтіруге дайындалғаны анық", дейді.
Кәкима ҚАЖИПАНОВА, МАРҚҰМНЫҢ АНАСЫ:
Үйге келгеннен кейін қызым айтты: "Біз екеуміз екі түрлі адамбыз, мама. Маған қол жұмсайды, түнімен ұйықтатпаған күндері болды отырғызып қойып. Аяқ жаққа отырғызып қойып, ұйықтап бара жатсам аяғымен түртіп оятады", - деді. Жұмыстан сәл кешігіп қалсам, автобуспен келеді ғой. Кейде дүкенге соғады. Сондайда есікті кілттеп қояды дейді. Сонда талай жаңбырда, желде, боранда сыртта жүрген шығар, соның бірін де айтқан жоқ қой. Келісетін шығармыз деп ойлаған сияқты.
Ал полиция департаментінің дерегінше, адам өлтірді деген күдікпен Орал қалалық әкімдігінің бұрынғы қызметкеріне қатысты қылмыстық іс қозғалған. Бірақ тергеу барысында кейбір мәселелерді нақтылау үшін арнайы сараптама тағайындалып, күдікті Алматы қаласына жіберілген.
Мөлдір САДЫРҒАЛИЕВА, БҚО ПД БАСПАСӨЗ ҚЫЗМЕТІНІҢ ЖЕТЕКШІ МАМАНЫ:
Сараптаманың қорытындысына сәйкес, бұл жерде тергеудің қойған сұрақтарына жауап алу мүмкін болмады. Сондықтан стационарлық режимде психологиялық-психиатриялық сараптама жүргізуге шешім қабылданды. Ол Алматы қаласында жүргізіледі. Ендігі сараптаманың нәтижесін күтудеміз.
Күдіктінің қорғаушысы, "ол бұрынғы әйелінің жұмысына барып, балаларының болашағын ақылдасқысы келді, оны өлтіру ойында болған жоқ, дейді.
Ғинаят САЛЫҚОВ, КҮДІКТІНІҢ ҚОРҒАУШЫСЫ:
Пышағы мұның қалтада жүретін сувенирлік пышақ. Міне, сот-дәрігерлік сараптамасы бойынша 4 рет кеудесінен пышақ салған. Ал басқа 13-інің бәрі, олар - жеңіл жарақат! Қазір мен сізге Жоғары соттың постановлениесін көрсетемін. Бүкіл жарақат салғаны бар ғой, 30 секундтың ішінде. Ал енді анадай қатыгездікпен жасау үшін оған енді уақыт керек.
Сарапшылар қылмыстың қандай жағдайда жасалғанын анықтап жатыр. Яғни күдіктіге қандай баппен айып тағылатыны нақтыланады.
