Алаяқтарға алданған алматылық журналист банкирлердің өзінен күдіктенеді
pixabay
Алматылық журналист алаяқтар банктің өз ішінде отыруы мүмкін деген тұжырымға келгенін айтады, деп хабарлайды Zakon.kz.
"Астана" телеарнасының алматылық тілшісі Әсем Лесбек алаяқтарға қалай алданып қалғанын білмей дал. Өткен сенбі күні телефонына өзін Әмина Мамырова деп таныстырған бейтаныс адам қоңырау шалған. Банк қызметкері екенін айтқан. Оның атына несие рәсімделіп жатқанын хабарлапты. Бұл алаяқтардың әрекеті екенін айтып, оларды тоқтату үшін айтқандарын бұлжытпай орындауды талап еткен. Тіпті банк қосымшасына кіріп қаражаттарын тексеруді сұраған. Ешнәрседен күдіктенбеген Әсем айтқандарын жасаған. Артынша алаяқтардан қорғаймын деген адам, оның атына екі банктен шамамен 2 миллион теңгеге жуық несие рәсімдеп үлгерген. Ал аты дардай банктің қалайша бірнеше минутта несиені мақұлдағанын ешкім түсіндіре алмай отыр.
Әсем ЛЕСБЕК, АЛМАТЫ ҚАЛАСЫНЫҢ ТҰРҒЫНЫ:
Өтініш жібердім. Өтінішім мақұлданған жоқ. Халық банк 200 мыңға "одобрение" берген жоқ. Ал алаяқ рәсімдеген 1 млн 267 мыңға рұқсат берген. Бұл жерде сонда "алаяқтар банктің базасында отыра ма" деген күмән қоюланады. ЭЦП кілтке келетін болсақ, бұл жерде қағаз бойынша басқа біреудің нөмері, басқа да бір штрихкодтар тұр. Тек қана менің аты-жөнім, ИИН-ім тұр. Яғни, басқа адамның нөмірімен басқа адамның ЭЦП-сымен Халық банк 1 млн 200 мыңды бере салған.
Алматылық алданғанын кеш түсінген. Ол банктің қалайша бірнеше минутта миллион теңгелік несиені мақұлдағанына аң-таң. Банктің мекемесіне барып, мән-жайды анықтағысы келген. Бірақ ондағылар мәселені шешуге құлықсыз дейді. Әсем алаяқтар банктің өз ішінде деп күдіктенеді.
Әсем ЛЕСБЕК, АЛМАТЫ ҚАЛАСЫНЫҢ ТҰРҒЫНЫ:
Барлық мен туралы жеке ақпараттарымды алаяқтың өзі аузымен айтып берді. Банктің бар айтып отырғаны, олар кез келген жерден біле салады сіздің аты-жөніңізді, кез келген нотариустан біле алады, немесе еговтан да біле алады деп. Тек өзіне шаң жуытпаудың мәселесі ғой. Қазіргі таңда оларға да арыз жазылды. Бірақ ешқандай іс-қимыл жоқ.
Банк өкілдері болса, қазір мұндай қылмыс көбейгенін айтады. Әрі жеңіл ақша тапқысы келгендер, адамдардың әлсіз тұстарын тауып, олардан деректерді шығарып ала алады дейді.
Досбол АРЫСТАНБЕКОВ, HALYK BANK АҚ БАСПАСӨЗ ҚЫЗМЕТКЕРІ:
Банктің қызметкері ешқашан қоңырау соғып сұрамайды. Егер сұраса, ол алаяқ. Бірден тұтқаны қоя салу керек. Әңгімені сол жерден тоқтатқан дұрыс болады. Алаяқтар банктің жүйесіне атака жасап жатқан жоқ, керісінше, клиенттердің әлсіз тұстарын тауып, олардың өздеріне деректеме шығару арқылы алдап жатыр. Осы тарапта айтып өтейін, мобильді қосымшаны қолданса да, банктің картасын қолданса да әрбір ел тұрғыны жауапкершілікті сезіну керек.
Әсем полицияға арыз жазған. Шағым бойынша қазір іс қозғалыпты.
Салтанат ӘЗІРБЕК, АЛМАТЫ ҚАЛАЛЫҚ ПОЛИЦИЯ ДЕПАРТАМЕНТІНІҢ РЕСМИ ӨКІЛІ:
Жәбірленуші полицияға қарашаның 6 күні хабарласқан болатын. Алатау аудандық полиция басқармасында Қылмыстық кодекстің 190-бабы бойынша көзделген қылмыстық іс қозғалып, қазіргі таңда іздестіру шаралары жүргізілуде. Мәселенің қалай шешілері белгісіз. Полиция, әзірге талдап, тергемекші. Сосын кінәлілерді анықтамақ.
Департаменттің дерегінше жыл басынан бері заңсыз несие рәсімдеу бойынша 400-ге жуық азамат шағым түсірген.
