TikTok-та Қорғаныс министрлігінің фейк аккаунты пайда болды

TikTok әлеуметтік желісінде ҚР Қорғаныс министрлігіне тиесілі көрінетін аккаунт пайда болды. Нақтысында, ол - фейк аккаунт, деп хабарлайды Zakon.kz.

TikTok-та mod.gov.kz деп аталатын пайдаланушысы ондаған бейнеролик жариялап үлгерген. Олардың бір бөлігі – ҚР Қарулы Күштерімен байланысты оқу-жаттығулардың видеолары мен жаңалықтарынан үзінділер.

Құзырлы ведомства, шын мәнінде, бұл аккаунттың ҚР Қорғаныс министрлігіне ешқандай қатысы жоқ екенін мәлімдеді.

https://vm.tiktok.com/ZSeTLqDLB / сілтемесі бойынша ашылатын TikTok аккаунты фейк болып табылады. Оның ҚР Қорғаныс министрлігінің ресми аккаунттарына қатысы жоқ, – делінген министрліктің баспасөз қызметі хабарламасында.

Айта кетелік, ҚР Қорғаныс министрлігінің ресми сайтында TikTok ведомствоның аккаунттары бар әлеуметтік желілер тізімінде көрсетілмеген.

Бұған дейін әлеуметтік желіде қазақстандық әскери қызметшілерді Украинаға жіберу туралы ақпарат тараған болатын. Бұл дақпырт та жоққа шығарылды.