Қостанай облысында мұз жару жұмыстары басталып кетті
Сурет: Қостанай облыстық ТЖД
Қарасу ауданында өзен арналарында мұзды жару жұмыстары басталды. Алдымен Қарасу өзенінде, Белозерка ауылында, содан кейін Зеленовка ауылында осындай іс-шаралар жүргізілетін болды, деп хабарлады Қостанай облысының ТЖД.
Мұзды жарумен кәсіби тұрғыда айналысатын мамандандырылған топ жергілікті атқарушы органдар мен Қостанай облысының ТЖД бақылауы бойынша өзен арнасындағы көлемі 7,5 мың текше метрге жуық мұзды жарды.
Ол үшін өзеннің қатқан бетінен 220-дан астам шұңқыр бұрғылап, 500 келіге жуық жарылғыш зат пайдалануға тура келді.
Су объектілеріндегі мұзды жару мұз кептелісін болдырмау және су тасқыны қаупі бар елді-мекендер аумағында еріген судың апатсыз жағдайда өтуін қамтамасыз ету үшін сең жүру басталғанға дейін жүргізіледі.
Наурыз айының соңына дейін Әулиекөл, Жангелді, Науырзым, Қамысты, Қарасу және Бейімбет Майлин аудандарында жарылыс жұмыстары жүзеге асырылады. Өзендердің 15 күрделі учаскесінде жарылыс жұмыстарын жүргізу жоспарланып отыр.
