"Оқушылардың мұң-зары". Жабылған жолдың заңсыз екенін әкімдік бес жылдан кейін мойындады
Сурет: pixabay
Әкімдіктегілер екі төте жолдың заңсыз жабылғанын енді ғана біліп отыр. Бесағаш ауылындағы "Тау Самалы", "Апорт", "Самал", "Луч" атты төрт саяжайдың тұрғындары жол тауқыметін тартып келе жатқанына 10 жылдай болған. 700-ден астам оқушы ауылдағы үш мектепке барса, мыңға жуығы білім алу үшін Думан шағынауданына және Алматыға қатынайды. Ауылдан тыс білім ошағына жылдам жеткізетін төте жол жабылған соң, жеткіншектер шарасыздан мектепке жолдың жиегінен такси тоқтатып өзі барады. Ал кейбір алаңдаулы ата-аналар сөмкені арқасына асынып алып, баласын мектепке ертіп апарады, деп хабарлайды КТК телеарнасы.
Балаларымыз мектепке "Думанға" барады. Біз тасжолға шығып, айналып, кептеліспен жетуге бір сағат кетеді. Мына жерде 15 минутта жететін жол бар. Кәдігімгідей жол болған. Қалай сонда? Менің миым жетпейді! Екі ортада жатқан жолды жауып тастаған! Ары жақтағы көшені де жауып тастаған. Тағы бір үшінші нұсқасы – айналып өтетін жол. Оған да бетон қойып тастады. Бесағаш ауылының тұрғыны Мұрат Тәбитов
Жұрт кезінде осы үш жолмен емін-еркін қалаға қатынап, баласын мектепке апаратын. Айтуларынша, біріншісі осыдан 10 жыл бұрын жабылса, екіншісіне бес жыл бұрын қақпа тұрғызылған. Енді тағы бір шаһарға жылдам жеткізетін үшінші көше де жабық.
Үш көше жабылған соң тұрғында Талғар мен Алматыны жалғайтын тасжолмен жүруге мәжбүр. Қазір түскі уақыт, соның өзінде де көліктің нөпірі көп. Ал жұрт жұмысқа баратын таңғы уақыт пен үйіне қайтатын кешкі уақытта жүру мүмкін емес. Қарапайым қаланың өзіне шығуға таң атпай кептелісте екі сағат уақыт кетеді.
Жұрт жүріп жүрген бірінші көшенің қақ ортасына қақпа қойған үйдің иесі "жолды ашпаймын" деп қасарысып тұрып алды. "Бәрі заңды" дейді. Бірақ тұрғындарға құжатын көрсетпеді.
Біз жолды жабамыз деп сұрап алғанымыз жоқ. Бізге солай сатылды. Жерді сатып алдық. Солай бөлінген. Бізде құжат бар. Әкімдік бізді сотқа берді. Сот шешімі бар. Бұл жерде бас жоспар бойынша жол жоқ. Бесағаш ауылының тұрғыны Амантай Рақым
Ал екінші көшедегі үйдің иесі қалаған уақытында қоршауды ашады, қалаған уақытында жауып қояды екен. Көше бойындағы тұрғындар мұнда әбден жайғасып алған сыңайлы. Кіреберісінде қақпа тұрса, дәл жолдың бойынан септиктер қазылған. Бұл жерде бұрылыс болғанын газ құбырларына қарап-ақ аңғаруға болады. Соған қарамастан, дәл астындағы жер қоршаумен қоршалған.
Ал үшінші жолдың үстіне бетон қойып, көлік жүргізбеген сол маңдағы жергілікті тұрғындар екен. Ауыл түгілі, аудан әкімдігі де саяжайдағы екі жолдың заңсыз жабылғанын енді ғана біліпті.
Жоғарғы жол – біреудің жекеменшік жері. Ол кісінің қолында сот шешімі бар. Бүгінде соттан жоғары ешкім жоқ. Сондықтан сот шешімі сол жердің иесінің пайдасына шешіп берген. Екінші жол – ол жолды ашуымыз керек. Заңсыз біреу жауып алған. Айбек Бидаев, Талғар ауданы әкімінің орынбасары
Ресми өкілге жолдың жабылғанына бес жылдай болғаны, сол уақыттан бері заңсыз екенін ауыл әкімі қалай білмей келгендігі жөнінде сұрақ қойылды.
Оны білмейміз. Өйткені мен осы жерде бір ай жұмыс істеп жатырмын. Ауыл әкімі де жақында сайланған. Айбек Бидаев, Талғар ауданы әкімінің орынбасары
"Жақында ғана сайландық" деп ақталған атқамінерлер екінші жолды бір айда ашамыз деп сендірді.
Оқи отырыңыз
