Петропавлда суық су құбыры жарылды

Петропавлда құбыр жарылды, сурет - Zakon.kz жаңалық 12.12.2022 13:46

Сурет: pexels

Петропавлдағы 314 атқыштар дивизиясы көшесінің бойында 12 желтоқсанға қараған түні D800 мм суық су құбыры жарылды. Бұл туралы Петропавл қаласының әкімі Руслан Анбаев Instagram-дағы парақшасында жазды, деп хабарлайды Zakon.kz.

Әкім ақау болған жер анықталғанын айтты.

"Қазір "Қызылжар су" ЖШС бүлінген жерді жөндеп жатыр. Арнайы техниканың кедергісіз өтуі үшін қалаға Пестрое жағынан кіретін жол уақытша жабылды. Береке шағын ауданы мен Рабочий ауылын қоспағанда қаладағы су құбырының қысымы қалпына келтіріліп жатыр", - деді Руслан Анбаев.

Мамандар бұл аймақтардағы қысымды күшейту үшін шара қолданып жатыр. Құбыр толығымен қалпына келгенше тұрғындарға су жеткізіледі. Әкім бұл мәселені жеке бақылауында ұстайтынын айтты.

1 желтоқсанда Петропавлда су құбыры үзілді. Соның салдарынан көшелерді су басып, жүздеген тұрғын сусыз қалды. 15 көпқабатты үйдің тұрғындары, сонымен қатар әлеуметтік нысандар зардап шекті. Барлық қала бойынша құбырлардағы қысымды төмендетуге тура келді.

6 қарашада Петропавлда қар жауғаннан кейін су құбыры бұзылып үлгерді. 14 үйде су уақытша өшіріліп, қаладағы қысым төмендеді.

Петропавлда су құбыры жарылар алдында құбыр жөнделді. Апат жаңа жабдықта болған.

Оқи отырыңыз