«Құсбегіліктен» ересектер арасында өткен XVI чемпионатта Қазақстанның үздік бүркітшілері анықталды
![Құсбегілер марапатталып, анықталды, сурет - Zakon.kz жаңалық 27.02.2023 10:53](https://kaz.zakon.kz/pbi/WEBP/2023-12-20/file-29ea4f5c-976f-45d6-b124-d452660ed174/800x450.webp)
Чемпионат ҚР Мәдениет және спорт министрлігі, Ұлттық спорт қауымдастығы, республикалық «Құсбегілік» федерациясы мен Атырау облыстық әкімдігінің ұйымдастыруымен өтті.
Ересектер арасында «Құсбегілік» ұлттық спорт түрінен Қазақстан Республикасының XVI чемпионатында бүркітшілер сайысы бойынша «Қарашолақ» құсын баптаған Күнтуған Арманбек жеңімпаз атанды. Екінші орында Абай облысынан келген Байқадамов Ерзат, ал үшінші орында Күнтуған Серікбек (Астана қаласы) пен Қошқаров Арман (Атырау облысы) тұрақтады.
![Құсбегілер марапатталды, сурет - Zakon.kz жаңалық 27.02.2023 10:53](https://kaz.zakon.kz/pbi/WEBP/2023-12-20/file-0bd03c43-6300-4253-b6a6-3315a625157e/800x450.webp)
Сурет: Республикалық «Құсбегілік» федерациясы
Қаршығаны қолға шақырудан Түркістан облысының өкілі Аршабай Дәурен бас жүлдені иеленді. Жүлделі екінші орынға Кеуенов Бағдат ие болса, үшінші орынды елордалық Күнтуған Серікбек пен Рауильұлы Құдайберген өзара бөлісті.
"Ал ителгі салудан Ақмола облысынан келген Кенжетаев Ерланға тең келер құсбегі болған жоқ. Жүлделі екінші орында Жамбыл облысының намысын қорғаған Бабажан Бақдәулет, ал үшінші орында Түркістан облысын бастаған Базарбаев Ибрагим мен Кеуенов Бағдат тұрақтады." Республикалық «Құсбегілік» федерациясы
Осылайша, командалық есепте Түркістан облысының құсбегілері 1 алтын, 1 күміс, 2 қола жүлде қанжығылап, көш бастады. Астана қаласы және Ақмола облысының өкілдері екінші және үшінші орындарға жайғасты.
![Құсбегілер марапатталып, анықталды, сурет - Zakon.kz жаңалық 27.02.2023 10:53](https://kaz.zakon.kz/pbi/WEBP/2023-12-20/file-70398168-c38f-4b49-b821-0d90b4242f66/800x450.webp)
Сурет: Республикалық «Құсбегілік» федерациясы
Бұған дейін хабарлағанымыздай, чемпионаттың алғашқы күні «Қолға қондыру» сайысының қорытындысы бойынша 18 бүркіт келесі айналымға өткен болатын. Қатысушылардың айтуынша, құстардың көрсеткен нәтижелеріне өңірде орын алған ауа-райы да өз әсерін тигізген. Айта кетерлігі, чемпионаттың ережесіне сәйкес тікелей иесінің қолына қонған бүркіт қана максималды 10 ұпайды еншілейді. Осы ретте ауа райының қолайсыздығын ескере отырып, қазылар алқасының шешімі бойынша 9 ұпайды еншілеген қатысушылар да келесі айналымға өтті. Ал «Шырғаға салу» сайысында 18 бүркіт екінші кезеңге өтті. Атап айтқанда, Ақмола, Алматы, Жамбыл, Абай, Қарағанды, Атырау облыстары мен Астана қаласының спортшылары жартылай финалға жолдама алды. Жарыстың екінші күні құстар «Қоянға салу» сайысында бәсекеге түсті.
Естеріңізге сала кетейік, жарысқа еліміздің 14 облысынан 50-ге жуық спортшы қатысып, чемпионаттың регламенті бойынша 31 бүркіт, 11 қаршыға, 10 ителгі бәсекеге түсті. Чемпионатқа қатысуға Алматы, Ақмола, Қарағанды, Жамбыл, Шығыс Қазақстан, Түркістан, Маңғыстау, Павлодар, Атырау, Абай, Жетісу, Ұлытау облыстарының, сондай-ақ Астана қаласының спортшылары ниет білдірген.
"Құсбегілік ұлттық спорты қазақ тарихында тамыры тереңге тараған еліміздің төл мәдени құндылығы болып саналады. Негізгі мақсат – ата дәстүрді дәріптеп, сан ғасырдан бері әдет-ғұрыпқа сіңісті болған дара өнерді бұқаралық спортқа айналдыру, сондай-ақ әлемдік деңгейге көтеріп, саяхаттап келуші туристердің қызығушылығын туғызатындай дәрежеге жеткізу." Республикалық «Құсбегілік» федерациясы
![Құсбегілер марапатталып, анықталды, сурет - Zakon.kz жаңалық 27.02.2023 10:53](https://kaz.zakon.kz/pbi/WEBP/2023-12-20/file-9e0a911a-11bd-446b-8192-92b02912f982/800x450.webp)
Сурет: Республикалық «Құсбегілік» федерациясы
Чемпионатқа қатысты ақпарат «Құсбегілік» федерациясының Instagram және Facebook әлеуметтік желілеріндегі парақшаларында қолжетімді.