ҰҚК Алматыда арнайы операция жүргізді: есірткі зертханалары мен үлкен қойма жойылды

2023 жылғы 12 және 14 шілдеде Ұлттық қауіпсіздік комитетінің Алматы қаласында өткізген іс-шаралары нәтижесінде екі есірткі зертханасы мен химиялық прекурсорлардың ірі қоймасы жойылды, деп хабарлайды Zakon.kz.

"10 келіден аса "мефедрон" синтетикалық есірткі, 15 тоннаға жуық прекурсорлар, сонымен қатар 4-5 есірткі зертханасын іске қосуға мүмкіндік беретін арнайы құралдар анықталып, тәркіленді", – деп мәлімдеді ҚР ҰҚК баспасөз қызметі.

Ведомство есірткі әзірлеу үстінде республикамыздың 4 азаматы ұсталып, оларға қатысты сот санкциясымен қамауға алу түріндегі бұлтартпау шарасы қолданылғанын айтты.

Сурет: ҚР ҰҚК баспасөз қызметі

"Бұл фактілер бойынша сотқа дейінгі тергеп-тексеру жүргізіліп жатыр".ҚР ҰҚК баспасөз қызметі

Сурет: ҚР ҰҚК баспасөз қызметі

ҰҚК биылғы жыл басынан бері 24 есірткі зертханасын, 20 халықаралық және 23 аймақтық есірткі арналарын жойып, 780 келі синтетикалық есірткі мен 68 тоннадан аса прекурсорларды тәркілеген.

Сурет: ҚР ҰҚК баспасөз қызметі

"Есірткі және психотроптық заттар мен олардың аналогтарының заңсыз айналымына, сатылуына, сақталуына, әзірленуіне, өсірілуіне, өңделуіне және сатып алынуына қатысы бар қылмыстар заң талаптарына сай 3 жылдан 20 жылға дейінгі мерзімге бас бостандығынан айыруға жазаланады", – деп ескертті Ұлттық қауіпсіздің қызметі.

Алматы полиция департаменті 11 шілдеде есірткіні өндіріп, таратқан деген күдікпен үш жас жігіт ұсталғанын хабарлады.