Тараздағы фосфор зауытындағы жарылыс: Арнайы комиссия құрылды

Оқыс оқиға, сурет - Zakon.kz жаңалық 04.08.2023 18:25

Сурет: pxhere

3 тамызда Таразда фосфор зауытында жарылыс болып, жұмысшылар химиялық күйік алғаны белгілі. Осы оқыс оқиғаға байланысты "Қазфосфат" ЖШС түсініктеме берді, деп хабарлайды Zakon.kz.

"2023 жылдың 3 тамызында шамамен 11-30-да "Жаңа Жамбыл фосфор зауыты" ЖШС Жамбыл филиалында № 7 "Сары фосфорды өңдеу" цехында, сары фосфор қоймасының территориясында № 7 цехтың қара жұмысшысы Орманов Данияр және № 31 шикізат дайындау цехының аға инженері Қалдыбай Шахадияр химиялық күйік алды. Зардап шеккендер №1 қалалық ауруханаға жеткізілді. Жұмыс кілт тоқтатылып, оқиға орны қоршалды". "Қазфосфат" ЖШС баспасөз қызметі

Жазатайым оқиға туралы мына құзырлы органдарға хабар берілді:

1. Жамбыл облысы әкімдігінің "Еңбек инспекциясы" КММ;

2. ҚР ТЖМ Өнеркәсіптік қауіпсіздік комитетінің департаменті;

3. Жамбыл аудандық ПБ;

4. Тараз қаласының әкімдігі.

"Қазіргі уақытта мемлекеттік органдар өкілдерінен тұратын комиссия құрылып, тергеу қолға алынды. Жазатайым оқиғаның алдын ала себебі - қауіпсіздік ережелерін сақтамау. "Фосфор зауыты" ЖШС ЖФ өкілдері зардап шеккендермен тұрақты негізде байланыста. Қазіргі уақытта денесінің 22%-ы күйік шалған Орманов Данияр жансақтау бөлімінде, жағдайы тұрақты. Денесінің 15%-ы күйік шалған Қалдыбай Шахадияр жалпы палатаға орналастырылған, жағдайы - қанағаттанарлық деңгейде". "Қазфосфат" ЖШС баспасөз қызметі

"ЖЖФЗ" ЖШС ЖФ "Фосфор зауыты" зардап шеккен қызметкерлерге қажетті көмек беретіні де нақтыланады.

Оқи отырыңыз