Шымкентте із-түзсіз жоғалып кеткен қыз өлі күйінде табылды

Сурет: Zakon.kz

5 тамыздан бері іздеуде болған 18 жастағы Шымкент қаласының тұрғыны адам қолынан қаза тапқаны белгілі болды. Оның денесі жертөледен табылды, деп хабарлайды Zakon.kz .

Шымкент қаласы полиция департаментінің 8 тамыздағы мәліметі бойынша, бойжеткенді туған жездесі өлтірді деген күдікке ілінді.

Шымкентте әпкесімен уақытша тұрып жатқан 18 жастағы қыз жоғалып кеткені туралы арыз полицияға 5 тамыз күні түскен. Қыздың ағасының айтуынша, қарындасы 4 тамыз күні үйден шығып, қайтып оралмаған. Жедел-іздестіру жұмыстарына Шымкент қаласы полиция департаментінің барлық жеке құрамы жұмылдырылды. БАҚ-та және әлеуметтік желіде 18 жастағы қыз іс-түссіз жоғалып кеткені жөнінде хабарландыру таратылды.

"8 тамыз түнгі сағат 01:30 шамасында Әл-Фараби АПБ-ға туыстары үйдің жертөлесінен жоғалған қыздың өлі денесін тапқаны туралы хабарлады. Оқиға орнына барған жедел тергеу тобы жертөледен төсек жаймасына оралған, денесінде зорлық белгілері бар мүрдені анықтады", – делінген полиция хабарламасында.

Қызды өлтірді деген күдікпен туған жездесі ұсталып, УҰИ-ға қамалды.