ҰҚК өкілі шекарашылардың өзіне қол жұмсауына ойынға тәуелділік пен қарыз себеп дейді
Сурет: Қорғаныс министрлігі
Шекара қызметіндегі дедовщина туралы сұраққа жауап берген спикер мұндай құбылыс жоқ деп айтты.
"Шекара қызметінде дедовщина жоқ. Біздің әскерилер бір жыл ғана қызмет етеді. Сәйкесінше олар кеткен кезде келесі қоңырау соғылады, олар мүлдем қиылыспайды. Сондықтан бізде әскерде дедовщина жоқ".Ерік Беріков
Кейінгі кездегі өзіне қол жұмсау фактілеріне қатысты ол әр факті жан-жақты тексеріліп жатқанын айтты.
"Өкінішке қарай, мұндай фактілер болды. Әскери қызметкеріміздің өліміне қатысты мәселені бұған дейін де талқыладық. Әр факті бойынша жан-жақты қызметтік тексеру жүргізіліп жатыр. Кінәлі лауазымды тұлғалар қатаң тәртіптік жауапкершілікке тартылады. Кейінгі жағдайда бес шенеунік қызметінен босатылды, біреуінің лауазымы төмендетілді".Ерік Беріков
Ерік Беріков облыстық басқарма басшысы, шекара басқармасының бастығы, застава бастығы және тиісті тәрбие ісі жөніндегі орынбасарлары қызметінен босатылғанын алға тартты. Ол Шекара қызметінде арнайы бағдарлама бар екенін, оның аясында суицидтің алдын алуға бағытталған шараларды жүзеге асырып жатқанын айтып, өзіне қол жұмсау фактілері шекарашылар арасында жиі болады деген пікірмен келіспейтінін жеткізді.
"Себебі әртүрлі: отбасылық, тұрмыстық, кейбір психологиялық жағдайлар. Құмар ойындарға тәуелділік бар. Әскери қызметкерлер қарызға батып, осындай шешімге келген фактілер болды. Арнайы бағдарлама аясында Қарулы күштер мен басқа да әскерлер мен әскери құрылымдардың қызметкерлері өлімінің алдын алу шаралары қарастырылған".Ерік Беріков
2023 жылдың 1 мамырында әлеуметтік желілерде Алматыда ҚР Ұлттық қауіпсіздік комитеті академиясының курсанты өзіне қол жұмсағаны туралы ақпарат пайда болды.
