Атырауда құрылыс компаниясы құрылтайшылары үлескерлерді 650 млн теңгеге алдады деген күдікпен қамауға алынды
Сурет: Zakon.kz
Облыстық прокуратураның 15 қыркүйек күні мәлімдеуінше, Атырау облысында "Nazik group" ЖШС және "Андорра Констракшн" ЖШС құрылтайшыларына қатысты сотқа дейінгі тергеп-тексеру басталды, олар тұрғын үйдің үлестік құрылысына 650 млн теңге салған 30-дан астам азаматтың қаражатын заңсыз иемденді деп күдіктелуде.
"Күдіктілердің әрекеті салдарынан үлескерлер 2 жыл бойы баспанасын ала алмаған. Аталған серіктестіктердің құрылтайшылары соттың санкциясымен қамауға алынды".Атырау облысының прокуратурасы
Облыс прокуратурасы "әрбір азамат мұқият болуға тиіс және объективті хабардар болу үшін жергілікті атқарушы органдардың құрылыс бөліміне немесе басқармасына жүгіну қажет" екенін атап өтті.
Қаржылық мониторинг агенттігінің Шығыс Қазақстан облысы бойынша департаменті ЖШС басшылығына қатысты үлескерлерден заңсыз ақша жинады деген күдікпен қылмыстық істі тергеп жатыр. Оларға "халықтың сенімін асыра пайдаланып, оларды алдау арқылы 606,5 млн теңге сомасында ақша қаражатын" иемденді деген айып тағылды.
