Жетісу облысында көлік аударылып, бір адам қаза тапты

Жетісу облысының Ақсу ауданындағы Көлтабан – Матай тас жолында Mitsubishi Montero Sport көлігі жол апатына ұшырап, бір адам қаза тапты, тағы бір адам ауруханаға жеткізілді, деп хабарлайды Zakon.kz.

Жетісу облысы полиция департаментінің мәліметінше, ауылдық жолдың 50 шақырымында 63 жастағы жүргізуші көлік тізгініне ие бола алмай аударылып кеткен.

"Оқиға орнынан екі ер адам ауруханаға жеткізілді, олардың біреуі ауруханада көз жұмды. ҚР ҚК-нің 345-бабына сәйкес тергеу амалдары жүргізілуде", – делінген полиция департаменті таратқан хабарламада.

Полицейлер қазір жол-көлік оқиғасының мән-жайы мен жүргізушінің рөлді басқара алмай қалуына не себеп болғанын анықтап жатыр.