Абай облысында қатты жел жолда кетіп бара жатқан жүк көлігін аударып жіберді

Абай облысындағы тас жолда қатты желдің салдарынан ауыр жүк көлігі аударылды, деп хабарлайды Zakon.kz.

Абай облысы полиция департаментінің мәлімдеуінше, бұл жайт 19 желтоқсан Омбы – Майқапшағай трассасының 913 шақырымында болған.

Жүргізушіге жолда кетіп бара жатқан полиция қызметкерлері көмекке келген. Ауыр жүк көлігінің жүргізушісі – Ресей Федерациясының азаматы жол қозғалысы ережелерін бұзуға жол бермегенін, көлік қатты желдің салдарынан аударылғанын айтқан.

Полицейлер ауыр жүк көлігін жолға шығара алатын тиегішті алу үшін ЖШС-лердің біріне жүгінген. Кюветтен ауыр жүкті шығару операциясын толық сүйемелдей отырып, тәртіп сақшылары көлікті жақын маңдағы елді мекенге дейін жеткізген.