Абай облысында төтенше жағдай: жауған қардың биіктігі 80 сантиметр

Cурет: ҚР ТЖМ

Кейінгі күндері Абай облысында қалың қар жауып, биіктігі 80 см-ге дейін жетті. Республикалық маңызы бар жолдарда қозғалыс шектеліп, облыстың бір өңірінде төтенше жағдай режимі енгізілді. Бұл туралы Zakon.kz хабарлайды.

Төтенше жағдайлар министрлігі өңірдегі құтқару жұмыстарының барысы туралы хабарлады.

Қалбатау-Майқапшағай тас жолының 970-995-шақырымында Абай облысының жол қызметкерлері мен Төтенше жағдайлар департаментінің күшімен 385 адам эвакуацияланды. Тиімділік үшін жердегі ғана емес, әуе қатынасы да тартылды.

Қалбатаудан Көкпектіге дейін жол ашық. Жолды кеңейту жұмыстары жүргізіліп жатыр. Жол қызметтері тас жолда қалған көліктерді жылытуға көмектесіп жатыр.

"Бұл аумаққа барлығы 14 бірлік жол техникасы жұмылдырылды. Қауіпсіз өтуді жылдам қамтамасыз ету үшін қосымша қар тазалау техникасы мен жеке құрам тартылды", - деп хабарлады Төтенше жағдайлар министрлігі.

16 ақпанда ауа райының қолайсыздығына байланысты Абай облысының Көкпекті ауданында төтенше жағдай режимі енгізілді. Адамдарды құтқаруға әскери тікұшақтарды тартуға тура келді.

Оқи отырыңыз