Прокуратура Байжановқа қатысты бір айып тағудан бас тартты

Сурет: Zakon.kz

29 сәуірде Астананың қылмыстық істер жөніндегі мамандандырылған ауданаралық сотында Қуандық Бишімбаев ісі бойынша сот жарыссөздері басталуы тиіс еді, бірақ прокурор екінші сотталушы Бақытжан Байжановқа қатысты айыптаудың жаңа тұжырымын қабылдауды сұрады, деп хабарлайды Zakon.kz.

Мемлекеттік айыптаушы Асхат Нұрбеков жарыссөз басталар алдында Байжановқа қатысты айыптауды саралау бөлігінде өтінішхат беру үшін сот тергеуін қайта бастауды сұрады.

"Айыптаушы тарап ҚР ҚК 434-бабы бойынша, яғни қылмыс туралы хабарламағаны үшін Байжановқа қатысты айыптаудан бас тартады. Байжановқа қатысты қылмыстық істі ҚР ҚК 432 – бабы бойынша - аса ауыр қылмысты жасыру дерегімен жалғастырады", – деді прокурор.

Ол айыптаудың жаңа тұжырымдамасын қабылдауды сұрады. Тараптар қарсылық білдірмеді, судья сот тергеуін қайта бастау туралы өтінішті қанағаттандырды.

"Біз қарсы емеспіз, бірақ мұнда жаңа тұжырым мен жаңа дәлелдер болғандықтан, бізге уақыт қажет. Біз жазбаша түрде жаңа айыптау актісін алуымыз керек, менің қорғаушыммен келісуіміз керек. Сондықтан уақыт беруіңізді сұраймыз. Екі-үш күн", - деді Байжановтың адвокаты Ерлан Ғалымжанов.

Судья Айжан Құлбаева сот отырысы 2 мамыр сағат 10:00-ге дейін кейінге қалдырылатынын хабарлады.

Бұған дейін экс-министр Қуандық Бишімбаевтың ісі бойынша жарыссөздің басталуы 10:00-ден 14:30-ға кейінге қалдырылды. Сот отырысы залында сотталушылардың болмауы себеп болды.

Оқи отырыңыз