Алматыда құйғытып жүрген мектеп түлектерінің кортежі видеоға түсіп қалған

Полиция, Алматы, мектеп түлектері, кортеж, сурет - Zakon.kz жаңалық 26.05.2024 09:50

Сурет: pexels

25 мамырда Алматыда мектеп түлектері мінген көліктер кортежі жол қозғалысы ережелерін өрескел бұзған, деп хабарлайды Zakon.kz.

Алматы қалалық полиция департаментінің мәліметінше, 12 автокөліктен тұратын кортеж "Көктөбе" ықшам ауданы маңынан төбе көрсеткен.

Видеода жастардың көліктің төбесіндегі терезеден басын шығарып, қозғалыстың басқа қатысушыларына кедергі келтіргені байқалады. Қалай болса, солай тайсақтаған кортеж қаладағы бейнебақылау жүйесінің камераларына түскен.

"Өткен жылдардағы тәжірибені ескере отырып, биыл Алматы қалалық полициясының саптық бөлімшелері профилактикалық және құқықтық түсіндіру жұмыстарын күшейтті. Бұған дейін хабарланғандай, полиция базасында алдын ала автокөлік жалдау фирмаларының басшыларымен кездесу өткізілген болатын. Жол қозғалысы ережелерін өрескел бұзу фактісінің алдын алынды. Аталған кортежді мамандандырылған батальон қызметкерлері ұстады", - деді Алматы қаласы ПД жергілікті полиция қызметі басқармасының бастығы полиция полковнигі Серік Шумаев.

Оның айтуынша, жүргізушілерге қатысты жолаушыларды тасымалдау ережелерін бұзу, қауіпсіздік белбеуін тақпау, жалған мемлекеттік нөмірмен жүру, маневр жасау ережелерін бұзу, апатты жағдай туғызу бойынша 84 әкімшілік хаттама толтырылды. 12 көлік арнайы айып тұрағына қойылды.

Оқи отырыңыз