Медбике болмаған: Бурабайдағы лагерьде 15-тен астам жетім бала ауырып қалды

Сурет: pixabay

Павлодар облысының жетім балалары демалатын Бурабайдағы "Эдельвейс" лагерінен 2024 жылдың 6 шілдесіне қараған түні суық тиіп ауырған бірнеше бала ауруханаға жатқызылды, деп хабарлайды Zakon.kz.

Мекемедегі келеңсіз жайт туралы Павлодар мәслихатының депутаты Гүлжайна Даримова айтты. Ол жұмыс сапары барысында аталмыш лагерьге барған.

"Мұнда Павлодардағы балалар үйінің тәрбиеленушілері демалады. Ақпаратқа сүйенсем, кемі алты баланың қызуы көтерілді. Лагерьде медбике болмаған, жедел жәрдем аумаққа шақырылмайды. Сондықтан түнде жедел жәрдем шақырдым. Олар қызуы бар тоғыз баланы бірден алып кетті",- деп жазды депутат.

Оның айтуынша, таңертең лагерьге Ақмола облысы әкімінің орынбасары, өңірлік денсаулық сақтау және білім басқармаларының басшылары, сондай-ақ балалар құқықтары жөніндегі уәкіл келген.

"Біз лагерьді тексеріп, біршама құқық бұзушылықтарды анықтадық. Бірақ 250 балаға бір дәрігердің болмауынан басқасының бәріне көзді жұмып қарауға болады. Сондай – ақ, балаларға арналған журналдар жүргізілмейді", - деп қосты Даримова.

Ақмола облысы әкімдігінің баспасөз қызметі 6 шілдеде түнде "Авиценна - Бурабай" ЖШС қабылдау бөлмесіне суық тию белгілері бар балаларды әкелгенін хабарлады.