Қазақстан мен Стати тараптары бейбіт келісімге қол қойды
Сурет: Zakon.kz
Келісімнің егжей-тегжейлері 2024 жылғы 16 шілдеде Әділет министрлігінің баспасөз қызметінде жарияланды.
Келісімге сәйкес:
Қазақстан Республикасының Үкіметі, Қазақстан Ұлттық Банкі мен Tristan Oil жетекші кредиторларының қолдауымен және келісімімен Стати тараптары Қазақстандағы мұнай-газ активтері туралы ұзақ мерзімді дауды бейбіт және өзара қолайлы реттеу туралы заңды күші бар негіздемелік келісімге қол қойды.
Тараптар барлық заңды талқылауларды тоқтатуға және барлық юрисдикциялардағы ағымдағы талаптарды тоқтатуға әкелетін өзара қолайлы шарттарда келісімге келуге қуанышты.
"Біз негіздемелік келісімді қолдаймыз және Президент Қ.Тоқаевтың құрметке сай реформаларының бөлігі ретінде Әділ Қазақстан құру туралы шешімін құптаймыз. Осы дауды реттеу Қазақстанның халықаралық шарттық міндеттемелерін сақтауын куәландырады, бұл инвестицияларды ұлғайтуға және оның экономикалық өсу әлеуетін арттыруға жол ашады. Біз Қазақстан үшін жаңа дәуірді құптаймыз". Дэниел Чапман, CEO Argentem Creek Partners
Өз кезегінде Әділет министрі Азамат Есқараев бұл келісімнің қоғамдық мүддені ескере отырып қабылданғанын және бюджет қаражатының жұмсалуын көздемейтінін айтты.
"Осы келісім қоғамдық мүдделерді ескерумен қабылданды және бюджеттік қаражатты жұмсауды көздемейді. Осы қадам елімізге жаңа инвестицияларды тартуға және экономиканың дамуына оң әсер ететініне сенеміз". Азамат Есқараев, Қазақстан Республикасының Әділет министрі
*Argentem Creek Partners – Стати тараптарының инвестициялық құралы Tristan Oil Limited-тің кредиторлары болып табылатын нақты қорлардың инвестициялық басқарушысы.
Молдавиялық бизнесмендер Анатол Стати мен оның ұлы Габриэль арасындағы Қазақстанға қарсы бірқатар соттық тартыстар 2010 жылы басталған. Швецияның арбитраждық сотында Молдова кәсіпкерлері бастапқыда 4 миллиард доллар талап еткен. Нәтижесінде 2013 жылы олар небәрі 506 миллион долларға оң шешімге қол жеткізді.
2022 жылдың маусымында Голландия соты Стати ісі бойынша KMG Kashagan B.V. 5,2 млрд долларға тең акцияларына тыйым салуды алып тастау туралы шешім шығарды. Сондай-ақ сот Статиге шығындар мен сот шығындарын төлеуге міндеттеді. Шешім 2021 жылдың желтоқсанында Нидерланд Жоғарғы сотының Стати алаяқтық жолмен алған арбитраждық шешімді тануды жою туралы шешімінен кейін қабылданды.
2022 жылдың желтоқсанында Стати әкесі мен баласына жалған құжат жасау, алаяқтық және ақшаны жылыстату бойынша қылмыстық іс қозғалды.
2023 жылдың 8 ақпанында Амстердам аудандық соты бизнесмендер Анатоль мен Габриэль Статидің және олардың компанияларының ("Стати") "Самұрық-Қазынаға" қарсы талаптарын қабылдауға болмайды деп шешті.
