Шымкентте такси көлігін таспен қиратқан әйелдің әрекеті желіні шулатты

Шымкентте такси көлігін қиратқан әйел қамауға алынды. Оның бұл әрекеті таспаға түсіріліп, әлеуметтік желіні шулатқан еді. Толығырақ Zakon.kz ақпаратында.

KTK телеарнасының ақпаратынша, спирттік ішімдікке сылқия тойған сылқымның көлікті қолындағы таспен қиратып жатқанын куәгерлер таспаға түсіріп, желіге жариялап жіберген. 

Белгілі болғандай, құрбысымен бірге такси шақырған ол салон ішін бүлдіріп, жүргізушінің құсықты тазалауын талап еткені шамына тиген. Сөйтіп, такси тізгіндеген азаматтың бетін тырнап алған ол, автокөліктің мониторын да сындырыпты.

Жүргізуші полиция шақыруға кеткенде даладан тас алып, машинаның терезелерін шаққан. Қазір, жүйкесі жұқарған әйел қамауға алынды. Оған қатысты біреудің мүлкін талқандау бабы бойынша қылмыстық іс қозғалды.

Бұған дейін Астана - Алматы автожолында жолаушылар автобусы өртеніп кеткендігі хабарланған болатын.