Алматы тауларында турист әйел аяғынан жарақат алды

19:41-де құтқару қызметіне Башут шыңынан түсіп келе жатқан турист әйел көмек сұрап хабарласқан, деп хабарлайды Zakon.kz.

Әйел адам бағытынан адасып, жолын жалғастыра алмайтынын айтқан.

Жеті минуттан кейін "Тұйықсу" бақылау-құтқару бекетінен бір техника мен бес құтқарушыдан құралған топ, топ жетекшісінің басқаруымен, оқиға орнына аттанған. Бір сағаттан кейін құтқарушылар зардап шеккен туристі тапқан.

"Әйел адам тобық тұсының ауырып тұрғанына шағымданды. Құтқарушылар оқиға орнында алғашқы көмек көрсетіп, жарақаттанған аяғын созылмалы таңғышпен таңып, тау-шаңғы жабдығын пайдаланып, қауіпсіздендіру жұмыстарын жүргізіп, туристі төмен түсіруге кірісті", – делінген хабарламада.

Сағат 23:05-те құтқару операциясы аяқталған. Турист медициналық пунктке жеткізіліп, Төтенше жағдайлар министрлігіне қарасты Апаттар медицинасы орталығының дәрігерлеріне тапсырылған. Олар зардап шеккен адамға ары қарай медициналық көмек көрсетті.

Бұған дейін Алматыда тауар толы қоймалар отқа оранғандығы хабарланған болатын.