Спорт жаңалықтары 
Трамп 25% кедендік баж енгізді: Қазақстанның сауда және интеграция министрлігі мәлімдеме жасады
Сурет: Zakon.kz
Министрліктің мәліметінше, Қазақстан АҚШ тарапынан енгізілген қосымша тарифтерге байланысты келіссөздерді жалғастырып жатыр. Биыл маусым айында министрлік өкілдері АҚШ-пен екіжақты кездесу өткізген. Онда Қазақстан өзара тиімді сауда ынтымақтастығын дамыту, тауар жеткізу тізбектерінің тұрақтылығын сақтау және нарыққа әділ қол жеткізу мәселелерін қамтитын ресми ұсыныс жолдаған.
Аталған ұсыныс АҚШ Президентінің 2025 жылғы 2 сәуірдегі Жарлығы мен оған енгізілген кейінгі өзгерістерге сәйкес әзірленген.
Келіссөздер барысында тараптар сауда-экономикалық қарым-қатынасты кеңейтуге бағытталған бастамаларды жан-жақты талқылаған. Қазақстан тарапы сындарлы әріптестікке дайын екенін растап отыр. Америкалық тарап та диалогты жалғастыруға ашық екенін білдірген.
Экспорттың 95%-дан астамы жаңа тарифтен тыс қалады
Министрлік хабарлауынша, енгізілген тарифтер Қазақстаннан АҚШ-қа жеткізілетін экспорттың тек 4,8%-ына ғана әсер етеді. Қалған 95,2% өнімге жаңа баждар қолданылмайды.
Қазіргі уақытта Қазақстан АҚШ-қа мұнай, уран, күміс, ферроқорытпалар, тантал, титан, бериллий және басқа да өнімдерді экспорттап отыр. Бұл өнімдердің басым бөлігі шектеусіз экспортталып жатыр.
Ал жаңа баж салығы сары фосфор, ферросилиций, линзалар, бидай глютені және аммоний нитраты секілді өнім түрлеріне әсер етпек.
Нақты сандар:
- 2025 жылдың бірінші жартысында АҚШ-қа 2,2 мың тонна сары фосфор экспортталған (жалпы өндіріс көлемі – 43 мың тонна);
- Ферросилиций экспорты – 1 482,6 тонна (жалпы өндіріс – 41 830,1 тонна);
- Аммоний нитраты бойынша АҚШ-қа тасымал жоқ, 2025 жылға экспорт жоспарланбаған;
- Бидай глютені бойынша алғашқы алты айда 6 500 тонна өнім жөнелтілген, бұл шамамен 8,12 млн АҚШ долларына тең.
Қазақстан тарапы алдағы уақытта да тарифтік шектеулердің теріс әсерін азайтуға бағытталған келіссөздерді жалғастыратынын мәлімдеді.
