Қазақстанда тоғыз айда 26 мыңнан астам жол-көлік оқиғасы тіркелді – ІІМ

Қазақстан Республикасы Ішкі істер министрлігінде 2025 жылдың 9 айындағы жұмыс қорытындылары талқыланған кеңейтілген алқа отырысы өтті. Бұл туралы Zakon.kz хабарлайды.

Отырыста айтылған мәліметке сәйкес, биылғы жылдың қаңтар-қыркүйек айлары аралығында еліміз бойынша 26 мыңнан астам жол-көлік оқиғасы тіркелген.

Қабылданған шаралардың нәтижесінде жол апаттарынан қаза тапқандар санының азаюы байқалады. Алайда министр әр санның артында адам өмірі тұрғанын атап өтіп, бұл бағыттағы жұмысты одан әрі күшейтуді тапсырды, – делінген хабарламада.

Сондай-ақ министр:

• трассалардағы патрульдеуді күшейтуді,
• патрульдік нарядтардың санын арттыруды,
• патрульдеу маршруттарын қайта қарауды,
• жол қозғалысын бақылауда цифрлық шешімдерді белсенді енгізуді тапсырды.

Еске салайық, 18 қазанға қараған түні Алматы қаласында BMW және Chevrolet Cobalt көліктерінің соқтығысуы салдарынан бірнеше адам зардап шеккен болатын.