Маңғыстау облысындағы колонияға тыйым салынған затты алып кіру әрекеті әшкереленді

Маңғыстау облысында қылмыстық-атқару жүйесі департаментінің №77 мекемесінде бақылау және тексеру тобының қызметкерлері тыйым салынған заттарды ішке өткізудің екі дерегін анықтап, жолын кесті.

Тексеру барысында қорғаушы ретінде келген азаматтың бас киімінен фольгамен оралған ұялы телефонның аккумуляторы мен SIM-карта табылды. Барлық тыйым салынған заттар тәркіленді.

Тағы бір жағдай басқа тергеудегі азаматқа арналған сәлемдемені қабылдау кезінде орын алды. Сәлемдеме әкелген әйелдің дәрі-дәрмек салынған қара түсті полиэтилен пакетінің ішінен жасырылған ұялы телефон анықталды.

Аталған екі факті бойынша материалдар ҚР Әкімшілік құқық бұзушылық туралы кодексінің 481-бабының 1-бөлігіне сәйкес сотқа жолданды.

Полиция ескертеді: қылмыстық-атқару жүйесі мекемелеріне ұялы телефондар мен олардың құрамдас бөліктерін, сондай-ақ өзге де тыйым салынған заттарды алып кіруге жол берілмейді. Мұндай әрекеттер үшін заңнамада әкімшілік жауапкершілік көзделген.