Қазақстан-Қырғызстан шекарасындағы шекаралық өкілдердің қызмет учаскелері айқындалды

Мәжіліс 18 қаңтар күні "Қазақстан Республикасының Үкіметі мен Қырғыз Республикасының Үкіметі арасындағы шекаралық өкілдердің қызмет учаскелері туралы хаттаманы ратификациялау туралы" заңды қабылдады, деп хабарлайды Zakon.kz.

Хаттаманың негізгі мақсаты – Қазақстан Республикасы мен Қырғыз Республикасының шекаралық өкілдері өз функцияларын орындауға жауапты болатын мемлекеттік шекара учаскелерінің аумақтық шектерін айқындау.    

"Қазақстан Республикасының тарапынан Алматы, Қордай және Тараз учаскелері; Қырғыз Республикасының тарапынан – Ыстықкөл, Шу және Талас учаскелері айқындалды". ҚР Ұлттық қауіпсіздік комитеті төрағасының орынбасары Ерлан Алдажұманов

Хаттама Қазақстан Республикасы мен Қырғыз Республикасы арасындағы қатынастардың құқықтық негізін белгілеуге және реттеуге бағытталған, Қазақстан – Қырғыз мемлекеттік шекарасындағы шекаралық өкілдердің қызмет учаскелерін айқындауды көздейді, бұл еліміздің Мемлекеттік шекарасының белгіленген режимін қолдауға ықпал ететін болады.