Тоқаев Катар халқын Ұлттық күнімен және футболдан әлем чемпионатының сәтті аяқталуымен құттықтады

Президент Қасым-Жомарт Тоқаев Қатар Әміріне құттықтау жеделхатын жолдады, сурет - Zakon.kz жаңалық 18.12.2022 18:27

Сурет: akorda.kz

Мемлекет басшысы Қатар Әмірі шейх Тәмим бен Хамад Әл Тәниді және Катар халқын Ұлттық күнімен құттықтай отырып, бейбітшілік пен ынтымақтастық қағидаттарын ұстанған елдің алдағы уақытта да қарқынды дами беруіне тілектестік білдірді, деп хабарлайды Zakon.kz.

"Осы мерейлі мейраммен тұспа-тұс келіп отырған футболдан әлем чемпионатының сәтті әрі табысты аяқталуымен шын жүректен құттықтаймын. Дүниежүзілік брендке айналған бұл дүбірлі дода Катардың бақуатты және болашаққа нық сеніммен қадам басып келе жатқан ел екенін тағы да растады. Әсіресе, қарапайым спорт жанкүйерімен қатар халықаралық қауымдастық та әлемдік біріншіліктің жоғары деңгейдегі жаңа стандарттарына куә болды", - деп жазылған жеделхатта.

Ақорда таратқан ақпаратқа қарағанда, Президент Шығанақтағы Қазақстанның басты серіктестерінің бірі – Катармен тығыз байланыстарымыз жылдан жылға ауқымы ұлғайып, ықпалдастығымыздың өрісі кеңейіп келе жатқанын зор ризашылықпен атап өтті.

Ол бірлескен күш-жігердің арқасында екі ел халықтарының игілігі үшін әлеуеті жоғары қарым-қатынастарымыз одан әрі дами түсетініне сенім білдірді.

Оқи отырыңыз