Оралда Сомалидан келген шетелдік тамада ұсталды

Ақтөбеден Оралға бара жатқан орта жолдан - Сырым ауданында 25 жастағы шетелдік ұсталды, деп хабарлайды Zakon.kz.

Өңірлік ПД баспасөз қызметінің хабарлауынша, шетелдік жігіт Алматы қаласының жоғары оқу орындарының бірінің студенті екен.

"Ұсталған азаматтың айтуынша, ол елімізде 2019 жылдан бері тұрады. Алматы қаласындағы ЖОО-да бағдарламашы мамандығында оқиды. Осы уақыт ішінде ол тілді жақсы меңгеріп, салтанатты іс-шараларға қатысып, ақша тауып жүрген. Оның визасының уақыты біткен, соның негізінде ҚР Көші-қон заңнамасын бұзу фактісі бойынша хаттама жасалды", делінген хабарламада.

Материал сотқа жіберілді. Ендігі кезекте шетелдік азамат депортациялануы мүмкін.