Ресей астығын Қазақстандікі деп сатқан шетелдік сотталды
Сурет: freepik
Қылмыстық іс ҚР ҚК 195-бабы 4-бөлігі 2-тармағы бойынша сараланды.
"2021 жылдың тамызы мен 2023 жылдың ақпан айлары аралығында М. А. "Кавсар-Агро" ЖШС-ның құрылтайшысы және директоры, "Зарият" ЖШС-ның директоры бола отырып, халықаралық көліктік транзиттік тарифті төлеуден жалтару ниетінде алдап-арбау жолымен астық өнімдерін Ресей Федерациясының аумағынан сатып алып, содан кейін оны Қазақстан территориясына жүк автокөлігімен жеткізген. Одан соң бұл өнімді қазақстандық астық ретінде Орталық Азия мен Ауғанстан елдеріне жеңілдетілген тариф бойынша экспорттаған", делінген Павлодар қаласы сотының хабарламасында.
Сондай-ақ М. А. тауарды Қазақстанға тиесілі екенін көрсететін жалған құжаттарды пайдаланған. Осылайша, квазимемлекеттік сектор кәсіпорынға жататын ҚТЖ-ның Жүк тасымалына халықаралық транзиттік тарифті төлеуден жалтарған.
Сот баяндамасындағы мәліметке сәйкес, жәбірленуші заңды тұлғаға келтірілген мүліктік залалдың жалпы сомасы 467 179 034 теңгені құрайды.
Прокурор сотталушыға 2 жыл 6 ай бас бостандығынан айыру жазасын тағайындауды сұрады.
Жәбірленуші тарап жазаның ең жоғары мерзімін тағайындауды, сондай-ақ одан материалдық залал сомасын өндіріп алуды сұрады.
Тәжікстан азаматы өз кінәсін толық мойындап, бас бостандығынан айырмауды өтінді.
ҚР ҚК-нің 195-бабының 4-бөлігінде көзделген қылмыс жазасы 5 жылға дейін бас бостандығын шектеуді қарастырады әрі ол ауырлығы орташа қылмыстарға жатады.
"М. А-ның кінәсін жеңілдететін мән-жайларды ескере отырып, яғни сотталушының өз кінәсін мойындауы, жасаған ісіне өкінуі, соттылығының болмауы, асырауында төрт жас баласының болуы, 1 000 000 сомасында залалды ішінара өтеуі және ауырлататын мән-жайлардың болмауын, қылмыстың қоғамдық қауіптілік дәрежесін, мүліктік зиянның ірі мөлшерінің өтелгенін ескере отырып, оған 2 жыл 6 ай мерзімге бас бостандығынан айыру, коммерциялық ұйымдарда 2 жыл мерзімге басшы лауазымдарды атқару құқығынан айыру түрінде жаза тағайындады", делінген сот шешімінде.
Сондай-ақ сотталушыдан жәбірленуші заңды тұлғаның пайдасына 466 179 034 теңге мөлшерінде материалдық залал өндірілді.
Үкім заңды күшіне енген жоқ.
