Қостанай облысында такси жүргізушісі алаяқтарға жем бола жаздаған зейнеткерге көмектесті
Сурет: Telegram/POLISIA.KZ
Оқиға 14 қыркүйекте Лисаков қаласында болған. Такси жүргізушісі Серік Нағашыбаевқа Лисаков қаласындағы бір мекен-жайдан заттар салынған сөмкені алып, Рудныйға жеткізу қажет екенін айтқан әйелден өтініш түскен. Әйел жеткізу сомасын 8 мың теңге деп көрсеткен.
Пакетті такси жүргізушісіне 80 жастағы зейнеткер берген. Ол қызының қиын жағдайға тап болғанын және тез арада заттарын жеткізу керектігін айтады.
Серік Нағашыбаев аталған мән-жайдан күдіктеніп, полицияға хабарласқан.
Зейнеткер қылмыскерлердің өзі шақырған такси арқылы алаяқтарға 3 миллион теңге аудармақ болған.
Полиция қызметкерлері Диас Рахметов пен Ерқанат Рахимов зейнеткердің қызында бәрі жақсы екенін айтып, ақшаны кері қайтарып берді.
Қазіргі таңда полицейлер алаяқтық жасамақ болған адамдарды анықтау мақсатында жедел іздестіру шараларын жүргізіп жатыр.
Зейнеткердің қызы Елена Кононюк полиция қызметкерлері мен такси жүргізушісіне алғыс білдірді.
