Tik-Tok-та танысын "жеңіл жүрісті қыз" деп айыптаған тараздық сот алдында жауап берді

Жамбыл облысының тұрғыны танысын жезөкшелікпен айналысады деп Tik-Tok әлеуметтік желісінде жалған ақпарат таратты. Өз кезегінде бойжеткен оны сотқа берді, деп хабарлайды Zakon.kz.

Мойынқұм аудандық сотында ҚР ӘҚБтК-нің 73-3 б. 2-б. (жала жабу) бойынша азамат А-ға қатысты әкімшілік іс қаралды.

Сотта 2023 жылы қазан айында азамат А. жәбірленуші С.-ны "жеңіл жүрісті қыз" деп абыройы мен қадiр-қасиетiне нұқсан келтіретін видеоны Tik-Tok әлеуметтік желісінде жариялағаны анықталды.

Сотта А. өз кінәсін толық мойындап, жасаған іс-әрекетіне өкініш білдірді. Жәбірленуші А-ны кешіріп, істі өндірісін тоқтатуды сұрады.

Сот қаулысымен А. тараптардың татуласуына байланысты әкімшілік жауапкершіліктен босатылып, іс тоқтатылды.

Қаулы заңды күшіне енген жоқ.