Атырауда адамдар денсаулығына зиян келтірген компанияға 37 млрд теңге айыппұл салынды

Экология, қауіпті қоқыс, мұнай, Атырау облысы, ЖШС, айыппұл, сурет - Zakon.kz жаңалық 19.12.2023 18:16

Сурет: pexels

Атырау облысында "Оxygenator" ЖШС-ның "Сағыз" полигонында 13 108 тонна қауіпті мұнай қалдықтары үйіліп қалған. Бұл жақын маңдағы 20 мыңнан астам халқы бар Доссор ауылы тұрғындарының денсаулығына тікелей қауіп төндірген, деп хабарлайды Zakon.kz.

"Полигон аумағында мұнай шламдарын қайта өңдеу бойынша тиісті жабдық болмағанына қарамастан, аталған ЖШС 2022-2023 жылдар аралығында мұнай компанияларына қызмет көрсетуді жалғастырған. Осыған байланысты, облыстық прокуратура уәкілетті органға тексеру жүргізуді тапсырып, оның нәтижелері бойынша ЖШС-ға ҚР ӘҚБтК-нің 328-бабының 1-бөлігі, яғни "Қоршаған ортаға жол берілетін антропогендік әсер ету нормативтерін бұзу" бойынша әкімшілік құқық бұзушылық туралы хаттама толтырылды".Атырау облысының прокуратурасы

Атырау қаласының әкімшілік құқық бұзушылықтар жөніндегі мамандандырылған соты "Оxygenator" ЖШС-ға 37,4 млрд теңге көлемінде айыппұл салды. Қаулы заңды күшіне енді.

Өз кезегінде прокуратура меншік нысанына қарамастан мемлекеттік және қоғамдық мүдделерге нұқсан келтіргені үшін жауапкершіліктің міндетті түрде болатыны туралы ескертеді.

Оқи отырыңыз