СҚО-да полицейлер есірткіге елітіп алып, көлік жүргізген жүргізушіні ұстады

Полицей, есірткі, көлік жүргізушісі, СҚО, сурет - Zakon.kz жаңалық 15.03.2024 19:58

Сурет: СҚО ПД баспасөз қызметі

Солтүстік Қазақстан облысында полицейлер тас жолда есірткіге елітіп алып, көлік жүргізген жүргізушіні ұстады, деп хабарлайды Zakon.kz.

"13 наурыз күні Көкшетау – Рузаевка автожолында 46 жастағы жүргізуші басқарып келе жатқан Audi автокөлігі тоқтатылды. Жүргізушінің көлікті басқаруы күмәнді көрінгендіктен, полицейлерге оны тоқтатты. Оған медициналық куәландырудан өту ұсынылды. Нәтижесінде ер адамның есірткілік масаң күйде екені анықталды", деп хабарлайды өңірлік ПД.

Ол 15 тәулікке әкімшілік қамаққа алынып, 7 жылға көлік жүргізу құқығынан айырылды.

Облыстық ПД мәліметінше, жыл басынан облыс жолдарында 39 жол-көлік оқиғасы тіркелді, салдарынан 7 адам көз жұмды, 65 адам жарақаттар алды. Ал 6 адам қаза тауып, 41 адам жарақаттанған 18 жол апаты республикалық маңыздағы жолдарда тіркелді.

"Екі айдың ішінде облыс аумағында апаттылыққа тікелей әсер ететін жол жүрісі қағидаларының 5 мыңға тарта бұзушылығы анықталды. Әрбір бұзушылық салдары ауыр болатын жол апаттарына алып келуі мүмкін екенін естен шығармаңыздар. Жол-көлік оқиғасын болдырмау үшін және жол қозғалысының қатысушыларының қауіпсіздігін нығайту үшін күшейтілген жұмыстар жалғасын табады", – дейді СҚО ПД жергілікті полиция қызметі басқармасы бастығының міндетін атқарушы Александр Розбах.

Оқи отырыңыз