Ақтөбе облысында “синтетиканың” 2 мыңға жуық дозасы тәркіленді

Ақтөбе облысы Полиция департаментінің 27 наурыздағы мәліметіне сай, Ақтөбелік ер адамнан синтетикалық есірткінің 2 мыңға жуық бір реттік дозасы тәркіленді, деп хабарлайды Zakon.kz.

Облыстағы ПД есірткі бизнесіне қарсы іс-қимыл басқармасы қызметкерлерінің жедел-іздестіру іс-шараларын өткізу барысында 35 жастағы қала тұрғынын ұстаған. Тергеу барысында күдіктіден ұнтақ заты бар 126 байлам тәркіленген. Артынша қызметтік иттің көмегімен жалдамалы пәтерді тінту барысында ұнтақ заты бар 10 zip-пакет табылған.

Сараптама нәтижесінде, табылған заттар мефедрон психотроптық заты болып шықты. Жалпы салмағы 275 граммнан асады. Тәркіленген 2 мыңға жуық бір реттік доза, 7 млн теңге сомасында.

Есірткі құралдарын, психотроптық заттарды, олардың аналогтарын аса ірі мөлшерде заңсыз сақтау фактісі бойынша сотқа дейінгі тергеп-тексеру басталды. Күдікті уақытша ұстау изоляторына қамалды. Осы баптың санкциясы үш жылдан жеті жылға дейінгі мерзімге бас бостандығынан айыру түріндегі жазаны көздейді.