Шетелге көлігімен бара жатқан СҚО тұрғыны шекарада жайсыз хабар алды

СҚО тұрғыны жүрілген Toyota Camry автокөлігін сатып алады. Ал жақында автокөлігімен шетелге сапарлап шыққан ол шекарада темір тұлпарының сәйкестендіру нөмірі қасақана өзгертілгенін, яғни оның қолдан жасалғанын біледі, деп хабарлайды Zakon.kz.

Өңірлік ПД баспасөз қызметі хабарлағандай, Ақмола облысында Қазақстан азаматының автокөлігінен жалған VIN-код анықталды.

"Солтүстік Қазақстан облысының тұрғыны жүрілген автокөлік сатып алып, көрші мемлекетке сапарлап бармақ болған кезде оның Ресей Федерациясында ұрланған көлік ретінде тіркеуде тұрғанын білді", деп хабарлайды Ақмола облысы ПД.

Ер адам аталған факт бойынша Көкшетау қалалық полиция басқармасына өтінішпен жүгінді.

"Ол осы жылдың 20 шілдесінде Щучинск қаласының тұрғыны өзіне VIN-коды өзгертілген Toyota Camry маркалы автокөлікті сатқанын хабарлады", делінген ведомство түсініктемесінде.

Аталған факті бойынша тергеушілер ҚР ҚК 386-бабының 1-бөлігі, "Көлік құралының сәйкестендіру нөмірін қолдан жасау" бойынша сотқа дейінгі тергеу амалдарын қолға алды.