Абай облысында иесіз жайылған малдарды анықтауда дронның көмегі көп болып тұр

Абай облысында полиция иесіз жайылған малдарды дрон арқылы анықтап жатыр. Өңір полицейлері дрондарды пайдалана отырып, жол бойында немесе автожолдарда бей-берекет жайылған малдарды анықтау жұмыстарын белсенді түрде жүргізуде, деп хабарлайды Zakon.kz.

ҚР ІІМ баспасөз қызметінің мәліметінше, Жаңасемей ауданында инспекция жүргізу барысында полиция қызметкерлері 40 жылқыны айыптұрағына орналастырды. Иесіз мал Семей – Өскемен және Омбы – Майқапшағай сияқты қарқынды қозғалысы бар трассаларда жиі жол-көлік оқиғаларына себеп болады.

Статистика бұл тәсілдің тиімділігін дәлелдейді: жыл басынан бері 11 мыңнан астам мал арнайы қораларға орналастырылып, 3,5 мыңнан астам мал иесі мал жаю ережесін бұзғаны үшін әкімшілік жауапкершілікке тартылды.

Дрондарды қолдану және полицияның жүйелі жұмысы тек оқиғалардың алдын алуға ғана емес, мал иелерінің жауапкершілік мәдениетін қалыптастыруға да мүмкіндік береді. Технологиялар мен дұрыс ұйымдастырылған жұмыс өңір жолдарын баршаға қауіпсіз ете алады.