Антикор Орал қаласының бас архитекторы алған параның видеосын жариялады

Бүгін, 2025 жылы 5 наурызда ҚР Сыбайлас жемқорлыққа қарсы іс-қимыл агенттігі Орал қалалық сәулет және қала құрылысы бөлімінің басшысы Мұратбек Ташенбаевтың ұстау сәті түсірілген видеомен бөлісті, деп хабарлайды Zakon.kz.

Видео Антикордың Telegram арнасында жарияланды. Онда шенеуніктің қалтасынан бір уыс ақша шығады. Антикор қызметкерлері ақшаны үстел үстіне жайып шығады.

"Тәшенбаев аз қабатты көппәтерлі тұрғын үйлер салу бойынша эскиздік жобаларды келіскені және сауда-саттықсыз жер учаскесін заңсыз беру жолымен лауазымдық өкілеттіктерін асыра пайдаланғаны үшін Көпбаевтан жалпы сомасы 1,5 млн теңге пара алғаны үшін кінәлі деп танылды", деп еске салады Антикор.

2025 жылы 5 ақпанда Орал қаласының соты қалалық сәулет және қала құрылысы бөлімінің басшысы Мұратбек Ташенбаевқа, оның қарамағындағы – бас маман Нұрсұлтан Ғатауға қатысты үкім шығарды.

Тәшенбаев пен Ғатау тиісінше 7 және 3,5 жылға, ал пара беруші Асылжан Көпбаев 7 жылға бас бостандығынан айырылды.

Олардың барлығы өмір бойы мемлекеттік қызметте және квазимемлекеттік сектор субъектілерінде лауазымдарды атқару құқығынан айырылған.