Ақтаулық оқушы Малайзияда өткен ауызша есептеу олимпиадасында бас жүлдеге ие болды
Zakon.kz
Орынгүл Ақтаудағы №17 мектептің 5-сыныбында оқиды. Ол оқушылар арасында «калькулятор» атанып кеткен. 1 минутта 25-30 есепке дейін ойша шығара алады, - деп хабарлайды Хабар 24 арнасы.
Дарынды жас жуырда Малайзияда өткен ауызша есептеу олимпиадасында да шапшаңдығымен талайды таңқалдырды. АҚШ, Ресей, Қытай сынды әлемнің 45 елінен келген 3 мың баланың ішінен озып шығып, бас жүлдені жеңіп алды.
– Мен Малайзияға бара жатқанда, бірінші орын алуды мақсат еттім. 2-3 айдай дайындалдым. Маған арифметика ойша есептеу ұнайды, - дейді Орынгүл Арыстан.
Бала күнінен есепке жүйрік Орынгүлді анасы былтыр менталды арифметикаға үйрететін орталыққа береді. Талантты оқушы бір жыл ішінде күрделі есептерді әп-сәтте шығаруды меңгеріп алған. Екі таңбалы санды екі секундта еш қиындықсыз алып, қосып, көбейте алатын ол үш таңбалы санды есептеуді үйрене бастады.
– Орынгүлдің қабілеті өте жылдам. Үйде де, жалпы басқа қосымша сабақтарда да өзін алға сүйреп қамшылайтын қыз. Үйінде анасы да, апалары да жан-жағы демеу болатын шығар. Өзінің ортасы себепкер болады деп ойлаймын. Біз жылдамдықпен күресеміз. Мидың оң жақ, сол жақ қабілетін жұмыс істету арқылы баланың қабілетін жылдамдатамыз, - деді Орынгүлдің инструктор, ұстазы Қарлығаш Әдірейімова.
Орынгүл – оқу озаты. Математикамен қатар тіл үйренуге де қабілетті. Қазақ, орыс тілімен қоса ағылшынға да жетік. Алайда дарынды қыздың арманы – анасы сияқты есепші болу.
